الصفحات
الكاملة
فضائية
الدستور
رسالة جلالة
الملك للدستور
موقع
زوار الأردن
موقع
جلالة الملكة
موقع
جلالة الملك

كيف تصير حيط واطي وإنت محترم..؟؟

كامل النصيرات

الثلاثاء 13 حزيران / يونيو 2017.
عدد المقالات: 505

هل عندك إحساس إنّو ظهرك مش ولا بُد..؟؟ يعني عندك حكّة في الظهر شديدة ومش قادر تحُك ظهرك ..؟؟ المساج مش جايب فايدة معك ..أو تكاليفه عالية عليك وإنت زلمة مسخّم ومسخمط و الأيّام ضاربتك بكندرتها القديمة ..؟؟ حلو ..حلو كثير ..!! هل يوجد لديك بقيّة باقيّة من فن التزلف و التزلّج و النفاق السياسي ..؟؟ هُنا مربط الفرس ..صحيح عندي سؤال على الهامش ..الفرس إللي مربطها هُنا ؛ شو أصلها ..يا ترى عربيّة أصيلة ..وإلاّ انجليزية بعد أكمن سنة رح تطخها بين عيونها ..؟؟ ما علينا ..حتى سؤالي ما عليه القيمة ..وإللي مش عاجبو السؤال أو مش فاهم المغزى إللي من وراه ؛ يعتبر السؤال مسحوبا بحبل يجر شاحنة كبيرة ..!!
حبيبي ..باختصار ..أنا مهتم جداً بأمر ظهرك ..لأنو ظهرك بحاجة ظهر ..فكيف إذا خسرت ظهرك الأصلي ..تكون هيك الأمور  وصلت ( لأبو موزة ) ..عشان هيك ..لازم تستعمل ظهرك من اليوم وطالع استعمال الغشيم ؛ مش استعمال العارف ..لأنو يا حبيب أمك وعمّك و خالك ..بدّك تترك دلالك ..وتمشي الدرب دغري ..والدرب الدغري لا تعني أبداً إنّك تكون مستقيما ..بل الدرب الدغري بهاي الأيّام معناها إنك تكون مطيع عَ الآخر ..وإنك ( تزقِّفْ ) لكل مسؤول تلمحه بطريقك ..ولكل خطاب تسمعه ولو بالصدفة ؛ لأنه ممكن هاظ الخطاب يكون تاريخي وإنت مش داري ..عشان هيك ؛ خُذْ احتياطك و زقِّفْ ..وافتح أُثْمَكْ عَ الآخر وانت تزقِّفْ ..
حبيبي باختصار أكثر ..وحتى ما تقول إني ألف وأدور معك وإنت مش فاهم إيش مطلوب منّك ..؟؟ لأني احتمال أكون ( جَلْوَحْتْ ) شوية بالحكي وفيه ناس ما فهمت عليّ ..لازم عشان تعيش ؛ لازم ( إتطاطي ) ..أيوة ..إتطاطي ..إتطاطي ..وحتى أخفِّفْ عليك الكلام ..ما بدّي أقولّكْ تصير واطي ..بدّي أقول تصير ( حيط واطي ) .. وكل الحكي إللي حكيتلكْ إيّاه بالأوّل عشان أوصلك لهاي النتيجة ..لازم تصير حيط واطي وإنت محترم ..لازم الكل يطلع على ظهرك ..لازم ظهرك يصير جسر بزفتة أو بدون زفتة مش مهم ..المهم المطلوب منّك ؛ إتطاطي و تعمل حيط واطي ..عشان ؛ عشان ؛ عشان ...صحيح عشان إيش ..؟؟  والله ما أنا عارف عشان إيش ..بس إللي بعرفه ..إنه إنت لازم تموت ..مش عشاني ولا عشان إللي ببطن الحامل ..لأ لأ ..لازم تموت عشان الوطن يعيش ..!!

رئيس مجلس الادارة: محمد داودية - رئيس التحرير المسؤول: محمد حسن التل