الصفحات
الكاملة
فضائية
الدستور
رسالة جلالة
الملك للدستور
موقع
زوار الأردن
موقع
جلالة الملكة
موقع
جلالة الملك

عمّان مش إلكْ

كامل النصيرات

الأربعاء 14 حزيران / يونيو 2017.
عدد المقالات: 505

قلتُ لك ألف مرّة يا ناقص يا هزيمات : عمّان ليست لك ..ولا لأشكالك ..عمّان لأهلها يا عمّي ..افهم عاد و خلِّصنا ..!! عمّان التي تحبّها في الليل ؛ وتقعد تتبطّح شمالا و يميناً في ( الغور ) بانتظار الصباح كي تذهب و تلاقيها ؛ هي غير موجودة إلا في خيالك ..ومهما بحثتَ عنها ..لن تجدها ..فعمّان يا ناقص يا هزيمات لمن معه أكثر ؛ ولمن يدفع أكثر..!!
بالأمس ..ألم تكن في عمّان ..؟؟ ألم تمشِ في شوارعها كالأهبل ..ألم تشعر أن كل الناس ( تؤشِّر ) عليك : هيّو إللي جاي من الغور ..؟ ألم يكن شكلك مثل أشكالهم ولبسك مثل لبسهم ..ومع ذلك عرفوك بالإحساس ..أنت غريب على كل حال ولو ( بوسّتَ ) الجميع و عملت حالك عارفهم من ألف سنة ..!!
بالأمس ..ألم تقف عمّان على أحد جبالها و لمّا ( مرّيتْ ) قعدت (تزقِّر) عليك حجار ..وهي تضحك و تضع يدها على فمها من شدة الضحك ..؟؟ ولك يا أهبل عمّان مش إلك ..عمّان للي لابس ( جينز و رص و كَص ) ..عمان للي يتعطر كل نص ساعة ..أو ينزل ينظِّف كندرته كل خمس دقايق ...!!
اسمع يا ناقص يا هزيمات يا اهبل ..انا اعلم كم تحب عمان ..وأعلم أنها لا تحبك ..يعني حب من طرف واحد ..لذلك أنصحك أن تذهب لأي محل بالة ..واشتري ( شورت لعند الركبة  ..و..فانيلا عليها صورة شفايف حمرا قد راس الغنم ) وبوط رياضة ..و سنسال أصفر ( فالصو ) برقبتك ..و واحد بإيدك الشمال تظل تلعب فيه بإصبع السبابة ..ومش غلط تحطلك إسوارة في إيدك ..و خلّي الموبايل بـ ( دكّة الشورت ) وسماعات الموبايل خليها شابكة على طول ..!! وإذا بدك تحط أي إضافات أو إكسسوارات ؛ مش غلط ..حُط وما تخاف ..!!
الآن يا ناقص يا هزيمات ..امشي بوسط شوارع عمّان حبيبتك ..امشي حبيباً مفعماً بـ ( الطنططة ) ..ستخرج عمان كلها لرؤيتك ..سيؤشرون عليك ..سيتهامسون ...ويقولون : إيش جايب الغوراني هون ..؟؟ وليش عامل بحالو هيك ..؟؟ يعني يا ناقص يا هزيمات رح يعرفوك إنك مش عمّاني..رح تظل مثل الثور الأبرق ..غريباً غريباً غريباً ..حتى لو شلقت حالك نصّين..!!

رئيس مجلس الادارة: محمد داودية - رئيس التحرير المسؤول: محمد حسن التل