الصفحات
الكاملة
تيوب
الدستور
رسالة جلالة
الملك للدستور
موقع
زوار الأردن
موقع
جلالة الملكة
موقع
جلالة الملك

«اصحى.. رح يجي يوم ما بتقدر تسوي اشي فيه غير النوم!»

تم نشره في الأربعاء 6 آذار / مارس 2019. 12:00 صباحاً

محمد الشواقفة

« اصحى، رح يجي يوم ما بتقدر تسوي اشي فيه غير النوم! «
هيك صحيت على صوت الزلمة اللي براسي..
 جملته هزت جسمي بالمعنى الحرفي و هزت روحي و الاثنين صحوا.. روحي صحيت أكثر بكثير..
مصيبتنا كلنا متعودين على كلشي حوالينا.. متعودين على كل تفصيل، على ناسنا و على أخبارنا .. على الشغل.. متعودين على الحياة كلها.
كلشي حوالينا بتغير ذرة ذرة و احنا مش حاسين.. كل تفصيل رح ينتهي و يجي بداله تفصيل ثاني بدون ما ننتبه...
مدرستك خلصت و التوجيهي اللي كان ذابحك خوف خلص.. و جامعتك المتعبة بدوامها و كويزاتها اللي ما بتخلص.. خلصت و طلعت منها بلا رجعة.. و كل قعدة قعدتها ما رح ترجع تقعدها و القهوة مش رح ترجع ولا الدكاترة ولا الإنتخابات... و أخوانك اللي صاروا معك و بفدوك بالروح؟ كلهم رح يروحوا مثل ما كل فترة خلصت و راحت و راح ناسها و صارت عبارة عن ذكريات و مشيت على قاعدة «سنة الحياة». و ناسنا رح نحس بقيمتهم بعد ما كلنا نبعد عن بعض؛ الصحبة الأخوية الأبدية بتتغير مع تغير الظروف و بتصير عبارة عن ذكريات و حكي مسلي... و الأخوة بتفرقوا تحت مسمى «ظروف الحياة و الشغل» و الأخوة تتحول لمناسبات و العزايم المبنية على «الواجب»... الأجداد بروحوا الجنة روح ورا روح بدون ما نحس و اللي ربونا بصيروا أجداد بطرفة عين و كطبيعة الحياة رح يلحقوا الأجداد..
و إحنا رح تمر علينا كل هاي الأمور غصب عنا و إحنا مش حاسيين فيها.. ليش ما بعرف..
مدرستك رح تصير ذكرى.. جامعتك بكل تفاصيلها و ناسها رح تصير ذكرى.. تختك رح يصير بيوم الأيام غريب عليك بعد ما ترحل من عند أهلك.. و صحبتك كلها رح تتغير كل ما تغير شغلك.. و رح تتجوز و تصير أنت أب بدورك و تلف عليك الدنيا و ترد تنسى حياتك و تتعود عليها كل ما تزيد مشاغلك و تنام و تصحى تلاقي صار براسك أول شعرة بيضا و تجفل... بعدها بتتعود على المنظر و لو صار عندك الف ما رح تحس صار في تغيير...
لحتى بيوم أنت تصير جد و تبلش الناس اللي حواليك تروح للجنة.. رح تزعل كثير على أول صديق الك بعدين رح يصير الأمر روتيني و تسمع عن وفاتهم بالراديو و تكتفي بقول» الله يرحمه كان زلمة مليح « و تكمل يومك زي ولا كأنه صار اشي... فكرتي بسيطة.. لا تتعود على الحياة ولا تغوص بالمشاغل فيها لدرجة انك تنسى إنك عايش و ما تقدر كلشي حواليك.. سوي اللي بريحك و كلشي بنفسك و ورجي الناس اللي بتحبهم انك بتحبهم.. حب السيجارة و القهوة مع صاحبك و ضحكاتكم سوا و احكيله قديش بتعزه.. و تعلم من دكتورك و احكيله شكراً من قلبك.. و اللي بتحبه ضلك ذكره انك بتحبه و ورجيه قديش بتحبه، و اقعد مع أهلك و حبوا بعض.. حبوا بعض قبل ما يصير كلشي ذكرى و قبل ما يجي اليوم اللي ببطل فيه كلشي زي أول... و سوي الأشياء اللي بنفسك و خذ قراراتك اللي ممكن رح تغير حياتك ولا تخاف من المجهول قبل ما يجي اليوم.. اليوم اللي ما رح تقدر تسوي فيه اشي غير النوم...

رئيس مجلس الإدارة: محمد داوودية - رئيس التحرير المسؤول: مصطفي الريالات - المدير العام: الدكتور حسين العموش