الصفحات
الكاملة
تيوب
الدستور
رسالة جلالة
الملك للدستور
موقع
زوار الأردن
موقع
جلالة الملكة
موقع
جلالة الملك

كلام مريض

كامل النصيرات

الأربعاء 29 تشرين الثاني / نوفمبر 2017.
عدد المقالات: 894

قلتُ لكم أكثر من مرّة : لما أمرض أهلوس؛  يعني قال وأنا مش مريض ما بهلوس ..!! إمبارح صحتني أم وطن و ( عرقي مرقي ) وقالتلي : شو مالك ..؟؟ مين هاي ( سماح ) ومين ( حتف ) ..؟؟ قلتلها وأنا نُصْ مْفتِّحْ و نُصْ مْغَمِّض : وأنا شو بعرفني ..؟؟ قالت : مو عاملي حالك مريض وأنك بتهلوس باسماء النسوان ..؟؟ قلتهلها وأنا أشد بلحافي على راسي وصوتي مخنوق : بدي أنام يا مَرَة..غطّيني و ثقلي غطاي ..و فكّيني من هلوساتك ..قال سماح و حتف قال..!!
ورجعت تغطّيتْ وسبحتُ بالعرق إللي نازل مثل الشُّرّارة ..وما صحيت إلاّ على أم وطن وهي فارطة من الضحك عند راسي وتقول : نام نام ..بدّك تذبح ( شنتر بن عدّاد ) ..إذبحو يا خوي؛ بس بعيد عن دارنا .. ومين سماح و حتف ..!! ورجعت نمت ..و برضو تغطّيت وعرقي مرقي وأكثر من شُرّارة .. ورجعت صحتني أم وطن وقالت : والله حالتك يا جوزي ما ينسكت عليها ..شو إللي بتخبِّص فيه ..نازل بتحكي : - ( الهَرْب الأحْلية ) و ( الشنّة و السيعة ) و ( تقوم قومة رحل واجد ) و ( رجولها يا اظهار ) ..!! ومن هالتخابيص ..شو ..كنّك خرفنت ..؟ وبرضو رجعت تقول ( سماح و حتف ) ..اتركني من كل إللي راح و قولي مين سماح و حتف ..؟؟!! هاي آخرتها يا أبو وطن ..؟؟
حرارتي كانت أكبر من أن أجادلها ..عرقي يدخل في حلقي ..وما فطنت إلاّ والنوم والخدر قد كبس مرة أخرى عليّ ..صحوت ..كنتُ قد صحصحتُ قليلاً ..سألتُ أم وطن : في هذه الجولة؛ عسى ما أكون خبّصتْ كمان ..قالت وهي تضحك: عدت نفس الحكي ..وقعدت طول الليل أحلِّل فيه ..!! قلتُ لها : وإن شا الله وصلتي لحل..؟؟ قالت : وَلوْ ..ترباية ذراعك ..شوف يا سيدي : ( شنتر بن عدّاد يعني عنتر بن شدّاد ) و ( الهَرْب الأحْلية يعني الحرب الأهلية) و ( الشنّة و السيعة يعني السنة والشيعة ) و ( تقوم قومة رحل واجد  يعني رجل واحد ) و ( رجولها يا اظهار يعني ظهورها يا رجال )..قلتلها ..والله عفارم عليك ..تصدقي أنا ما عرفت إللي حكيتو ..!! قالتلي : بس تعال جاي إللي ما عرفتو؛ مين سماح و حتف ..؟؟ قلتلها : حليتي الأصعب و أسهل شي ما قدرتي ( سماح و حتف يعني حماس و فتح ) ..!! قالتلي : هيك طمنتني ..والله محلّكْ في مكانو ..!! قلت إيش قصدك ..؟؟ قالت : يعني كلامك في محلّو ..بس يبدو إني  هلوستْ أنا الثانية ..!!

رئيس مجلس الإدارة: محمد داوودية - رئيس التحرير المسؤول: مصطفي الريالات - المدير العام: الدكتور حسين العموش